الخميس، 19 نوفمبر 2009

رجل / راس

-

رجل / راس

-

مسكين يا شعبي
ياللي عايش ف الحضيض
لا انت عالم أو مفكر
أو صنايعي أو مفيد
بس عايش بالمهاودة
والشحاتة م الغريب
بس عايش باشتغالة :
إن بلدك دا عنيد
أم دنيا ونيله ساحر
نوره باين من بعيد
أول اما الشمس طلعت
نوّرت على بورسعيد !!
لكن انت عرفت إنك
لسة عايش ف الحضيض
لا انت عالم أو مفكر
أو صنايعي أو مفيد

جوة سجنك كنت قاعد
جوة قلبك ألف عار
كبر خيبتك عيب فضايحك
كله عامل ليك حصار
إيه يخلي البسمة تظهر
إيه يبين الانتصار ؟؟
رد فعلك هو فرجة
ع المتوشة ليل نهار
قوم وشجع علّي سمّع
وبحماستك قيدها نار
قول هتاف النصر أحسن
ياما طال الإنتظار
أما كورتك دي ذخيرتك
واللعيبة دول جنودك
خلي كونك لعب كورة
خلي فوزك أحلى عيد

كله قام الوقتي فاق
كله حاسس بالعروبة
اللي ضاعت من سنين
فات عليها ألف طوبة
كله قام الوقتي صلى
قال: يا ربي والله توبة
بس خلي فريقنا يكسب
وعد اصلي ف كل نوبة
كله نام الوقتي شخر
لما شافوا ميت مصيبة
بس إحنا الهايفة تظهر
نصحى ليها, جاتنا خيبة
قوم يا شعبي وفوق ف مرة
دي الحياة خلوها مُـرة
نفسي اشوفك قبل موتي
لو ف مرة تعيش سعيد

يعني ليه الجندي أصبح
في عيونك رجل / راس
كان زمان العقل هو
كل حاجة والأساس
بس يظهر إن مخك
راح عليه واتشال خلاص
صح عادي تشوف فريقك
بس نفسي ف الحماس
اللي اشوفه ف ماتش كورة
يبقى زيه بالمقاس
بيه ترجع تاني حقك
بيه هنوصل للخلاص
بيه هنثبت إن إحنا
لسة عايش جوة روحنا
حب غالي لأرض غالية
فاق وصلّح من جديد

-

الخميس، 15 أكتوبر 2009

الأقـصى ذنـبي

-

الأقـصى ذنـبي

-

حصل اللي كنا خايفين حصوله
واللي فضلنا سنين نقوله
والمولى بيته ف إيد عدوه
والذنب كله هنشيل حموله

أخاف ف يوم أكون قصاده
ويقولي انت ماحمتش بيتي ؟؟
اقوله عمري ما جه ف بالي
ولا حتى مرة رفعت صوتي ؟؟
اقوله إيه ؟؟
وازاي أرد يا ناس عليه ؟؟

اقوله ناسي ؟؟
وقلبي كان على اخويا قاسي
ولما كان محتاجلي سيبته
بعدت عنه ما سألت فيه
اقوله إيه ؟؟

اقوله خايف ؟؟
وقلبي عمره ما كان مطاوع
أروح واضحي واموت بدافع
على أهلي برضه كنت خايف
على مالي أكتر كنت خايف
لكني منك .. ما كنت خايف
اقوله إيه ؟؟
ياما نفسي أعرف اقوله إيه ؟؟

عمر السكات ما كان وسيلة
لكنه خيبة وضعف حيلة
وكل لحظة سكوت بذنب
وسكتنا ليهم سنين طويلة

الذنب ذنبي وذنب أهلي
وذنب كل من شاف وطنش
شيطان وفينا عايش تملي
ف لسانا دايما نلقاه ويهبش
خليك يا شعبي وعيش حياتك
وبلاش تعكر ف يوم مزاجك
تفضل لآخر العمر ساكت
سكران دماغك, شمام محشش

طب هم ليهم ف الدنيا راحة
عشان تملي ماشيين بدينهم
بس احنا عمر ما نولنا راحة
ومصيرنا ممكن يكون مصيرهم
الآخرة ضايعة والدنيا منـّا
دا لو احنا أصلا كان لينا ملـّة
ومفيش فيه فايدة دول ناس جبلـّة
خايفين يضحوا, ناسيين جهنم

-

الأحد، 13 سبتمبر 2009

شـعـب عـبـيـط

-

شـعـب عـبـيـط

-

دايما حاسس حاجة غريبة
غامقة الدنيا وعيشة كئيبة
ألف وباء موجود حوالينا
شدة وهم وغم مالينا
خناقات طول اليوم ومشاكل
ظلم ف روحنا نازل واكل
رغم دا كله الشعب بيبقى
عنده مزاج وسعادة عجيبة

تحس كإن الشعب بيسكر
شارب حاجة مش مظبوطة
تلقاه طول الوقت يكركر
ودماغه عالية ومبسوطة
عارف إن الحق بتاعه
ضايع منه
عمره ما قام رجعه بدراعه
ولا كان همه

وقفاه طال من كتر الضرب
لكن عادي, أصل الشعب
خايف إن دماغه تبوظ
طيب إمتى يفوق ويعوز
إنه يرجع كل حقوقه
يلا يا شعب يا نايم فوقوا
دا الأموات هيقوموا من موتهم
وانتم لسة, مطول نومكم

خليكوا كدة بالضحكة البلها
اللي مفيش في الدنيا جمالها
تفضل دايما كدة في وشوشكم
تكبر برضه معاها خيبتكم
اوهموا روحكم
إن الدنيا فرح وسعادة
رغم حالتكم
اللي خرابها صبحت عادة
لجل العالم يعلا ويكبر
وانتوا تضيعوا أكتر واكتر
وفرحكم يصبح بزيادة

أنا محتار م ناس ناسيين
أرض وأهل وعزة ودين
راحوا بلاش
أغلى حاجات للشعب لكنه
ما استغلاش
بيهم ضحى لجل سعادته
وقال يا بلاش

أنا محتار من فرحة تخلي
المخ يشيط
يعني دي ضحكة وسط الحزن
ولا دي بسمة تخبي الجبن
ولا الكل خلاص اتجن
ولا الشعب دا أصله عبيط ؟؟

-

السبت، 15 أغسطس 2009

فـالحـب بـاق - إهداء لوالدي

-

فـالحـب بـاق
إهداء لوالدي

-

مهما طال البحث في قـلب الزحام
مهما تقـنا في اللـّيالي أن نـنام
مهما كان الجـرح فـينا لا يداوى
واحترقـنا من نـيران الاشتـياق

قـد يعـيـش الحـب رغـماً عن ألـوف
يبـقى حـيا في السـطور وبالحـروف
بيـن ثـنيات الرسائـل في القـصائـد
في قـلوب أنهكـت طول الفـراق

قـلبنا بالحب يحـيا وبلا قـلـب نموت
قد أذانا الحب لكن نحتويه في سكوت
نخشى يوما أن يضيع, نحن حقا مدمنوه
فهو طعم ساحر, مـرّ المذاق

إنما الدنيا صراع وسبـاق
والليالي في هدوء وانطلاق
فإذا ما باعـدتـنا اللـيالي
لن نخـف .. فـالحـب بـاق

-

الاثنين، 10 أغسطس 2009

فـرصة تـتـوب - في رمضان

-

فـرصة تـتـوب
في رمضان

-

إوعى تفكر إن الفرصة بتاعتك ضاعت
ربنا خلاّ برحمته بدل الفرصة دي ميـّة
واما ذنوبك تبقى كتيـرة وتوبتـك خابت
ممكن عادي تـتوب من تاني تجدد نيـّة

رمضان فرصة
وأكبر فرصة
لجل تكتــّر من حسناتـك
إيـّاك تـيأس
تـقدر لسّـة
تمسح أي ذنـوب في حياتـك
تـقدر تـبني
قصور في الجنـّة
وتـمنها صالح أعمالك
هبة م المولى
خلقها عشانـّا
رمضان لينا أغلى هديـّة

لو تـتعلم
تقرا وتختم
تاخد أجر من القـرآن
واما تصلّي
جماعة تملّي
وتـلبـّي مع كل أذان
وان تـتعود
تبقى تردّد
اسم العدل ف كل مكان
اضمن خيـر
في الآخرة كتـير
أمن ورضا م الله في الـدنيا

واعرف إن الدين ف حياتـك هوّا الأولى
اوهب وقـتـك كل حياتك لجل المولى
اوعى الفرصة تروح وتـفوت
قبل ما يـيجي عـليك الموت
وهتـتحسر لو ضيـّعت ف عمرك ثانية

-

الخميس، 6 أغسطس 2009

مفـيـش رجّـالـة

-

مفـيـش رجّـالـة

-

مفيش في زمانـّا خلاص رجالة
عدّا زمانهم وما عاد لينا
وتملّي نـندهله : تعالى
دي الرجالة مابقوش فينا

لما الراجل
لو كان راجل
يمشي يعاكس في الستات
مش بيهمه
أي مشاكل
ولا بيخاف ان كان له اخوات
وان تديله
نصيحة يديك
درس طويل في الحريات
فـاكر إنه
براحته يعاكس
عـيب والله ع الشّـنبات

وامّـا تلاقي
حد وصاحبه
اتعرفوا في الشات على واحدة
ويشوف صاحبه
يعيشله حكاية
ويقولـّه ع البت الجامدة
واما يشوفه
بيـكلمها
يعرف إن البنـتـين واحدة
قام علشان
البت دي سايبه
وما عاد بينهم تاني مودّة

واما فيه واحد
سايب بنـته
نازلة الشارع لابسة هـدوم
مش بالظبط
هدوم , لأ هي
تشبه كدة قمصان النوم
وبتـتمايع
كل الشارع
يحكي عليها طول اليوم
لأ والوالـد
عارف لكن
خايف يملا دماغه هموم

واما بتسمع
واحد يشتم
صاحبه بأمه ولا أبوه
أو بقرايبه
ولا بديـنه
ويعيب ف اللي بـيربوه
يفضل ساكت
أو يضحكله
أو يشتمه لو حتى أخوه
يعني مفـيش
إحساس ولا نخوة
ولا خوف ع اللي بيحبوه

أوضح حاجة
لما الشعب
يفضل غارق جوة همومه
والناس راضية
ولا تتكلم
ولا تـتحرك, ولا بيقوموا
طب فين راجل
نفسه يقاوم
نفسه يحس براحة ف نومه
يرفع صوته
ويمحي الظلم
ويطهـّر في الشعب سمومه

واما الناس
تفضل تتفرج
على إخوانـّا المحتـلين
ياما اتـذلوا
وياما اتهانوا
م الخنازير المحتـلين
وانـتهكوا
حرماتـنا, وعابوا
دينـّا, وهما من غير دين
وأملنا كان
في الرجالة
لكن هما كمان ساكتـين

فـين رجالة, شديدة حمّالة
لأيـّها كرب
عندها نخوة, عندها قوة
تشيل الصعب
الموجود منهم يتعدّوا
وقريـّب حتى هـيـنقـرضوا
يـظهر كدة إن الرجالة
ماتوا في الحرب

-

الأحد، 26 يوليو 2009

بـلاش قـبـاحـة

-

بـلاش قـبـاحـة

-

قـالوا زمان إن الـكلام
أحسن سلاح ومفـيش كلام
هو اللي بيه الناس
بتصحى
والدنيا سودة تبقى
فاتحة
فالعقل ملاّ
والإيد بتكتب
والصوت بيعلا
والظلم يهرب
والمولى خلا
في كل شاعر
منقوش في قـلبه
أحاسيس مشاعر
وكلام رقـيق
مليان طهارة
وكلام شـديد
بالاسـتـثارة
يصحي فـيـك القـلب مات
وساعات بتقـلب بالعياط
يلـوّن الصورة اللي بهتت
ويوجـه العقـل اللي تـاه
وتلاقي كلمة في مرّة هزت
ذكرى فـيك وقـلت آااه


لكن فـيه شعرا مالهومش
عـقـل
مع إنهم يـتسموا بـيه
لا همّا شعرا بأي
شكل
ولا اسمهم يتقال عليه
الشعر عمره ما كان
شتايـم
ولا عمره حتى كان
قـبـاحة
الشعر في عـذوبة
النـسايم
وكل كلمة فـيها
الصراحة
عمره ما يكـسَر
أصل دين
ولا يهـدّم
في المبادئ
الشعر تـقراه
كل عين
علشان يـبـيـّن
في الحقايـق
لكنهم ع الشعر
عار
يـتـبص ليهم
باحتقار


الحب لما يبقى طاهر
قلبوه سفالة
دا الحب طاقة كل شاعر
في أي حالة
الأصل هوا للقصايد
لو فيه بنمدح أو ندافع
ليه كل معنى للحب فاسد
وخلوا طعم العشق ضايع
بالـنقـاء المعنى يظهر
يوصّـله لـكل المسامع
والصغير يبقى واعي
واللي جاهل يبقى فاهم
واللي فيه التقوى سامع
أصله مايطيـقـش الشتايم
هوا أصلاً كـل بـيت
مكتوب عـشانه
لجل ياخد حقه م اللي
خـد مكانه
أو يحـرّر كل بلده
أو يعمـّر حتى فيها
أو يربي صح ولـده
لجل يبقى ف يوم حاميها


شفـت يا إنسان يا شاعر
كل قول محسوب عليك
والرقـيـب اداك أمانة
شعرك اللي وهـبه ليك
لو قتلت في البراءة
أو بعدت عن الصراحـة
لو لديـنه جـت إسـاءة
عـمر ما هـتحـس راحـة
فامـشي يا إنسان يا شاعر
في الـسّـلـيم .. وبلاش قـباحة

-

السبت، 25 يوليو 2009

شـكرك مـش كـفـاية

-

شـكرك مـش كـفـاية

-

نفسي اصلي يا رب بدل الخمسة عشرة
وكـل ثـانـيـة اقـول واكـتـّر في دعـايا
واقــرأ كـلامك كـل يـوم وأنـفـذه
بالحرف أبداً مش هسيب لو حتى آية
واطيـع تـملّي والديـّا وان عيـنيـّا
عـازوها مني أديهـالهم وبـرضايا
وف سبـيلـك كل حـاجة تبقى سهلة
وصعب شكرك لإنـه وحده مش كفاية
يــا رب شـكرك مـش كـفايـة

إزاي أوفـّي ف مرة فضلك
دا الشـكر وحـده مسـتحيـل
خلـقـت عيلتي وصـحبـتي
أكـرمـتـني بـكـل خـيـر
خـلـقـتـني وكـرّمـتـني
مـع إن انـا العبد الـذلـيل
يسـّرتـلي فـي دنـيـتـي
وجـّهتـني وهديت خطايا
يــا رب شـكرك مـش كـفايـة

مع إن شـكري ليك قليل
برحمتـك وغـناك قبلـته
سهلـتـلي برضه الـطريق
لجنـتـك ومحيت قـساوته
وعدتـني أعلى المنـازل
لو بس انـفذ اللي قولـته
أنا عمري عايـشه برحمتـك
وتـمـلـّي سـبـحانـك مـعايا
يــا رب شـكرك مـش كـفايـة

أنا خايـف انـي أضـل مـرة
وتكون يا رب غضبان عليا
أو ارد كـتـرة رحـمتـك
بذنوب تقيد بنيرانها فيا
يا رب ثـبـت خطوتي
دي محبتـك عليـّا غالية
برضـاك بتـكمل فرحتي
وجنتك دي أسمى غايـة
يــا رب شـكرك مـش كـفايـة

-

السبت، 11 يوليو 2009

فـي بُـعـدك عـنـّي

-

فـي بُـعـدك عـنـّي

-

قرب ليـّا أكتر واكتر
حتى وانت ف بعدك عني
إعرف حالي واللي جرالي
وانت بعيد ولا حتى سامعني
شوفني بعينك وانا بضحكلك
رغم ان انت مش بتـشوفـني
يعني انا روحي تبقى ف روحك
حـبـك يـبقى معايا حارسـني

مهما تروح انا حاسس حبك
حاسس إني جوة ف حضنك
حاسس برضه بلمسة إيدك
قدام عيني حاطط صورتك
سامـع صوتـك رقــّص قلبي
يـهـمس ليـّا يـقولي بحبـك
نفسي تكون طول عمرك جنبي
مهما عـليـّا تطـوّل غيـبـتـك

عمر لقانا ما كان يوم داعي
لـجـل الحـب يكمل بـينـّا
يمكن حلمي انـنـّا نـتلاقى
لـكن حبـّـنا أجـمـد مـنـّا
عايش مهما تـزيد الـغربة
حالف إنه ف يوم يجمعنا
خلا الدنيا بحزنـك صعبة
وبـفرحـك تـتحوّل جنـة

-

الجمعة، 10 يوليو 2009

حـور عـيـوني

-

حـور عـيـوني

-

يا حور عيوني يا جنتي
يا نور جفوني ودنـيتي
ياللي لقاكي كان بدايتي
والموت في حضنـك منيتي

أنا حبي فيكي إكسير حيـاتي
وشوقي لـيكي سبـب آهـاتي
وان كان عـلـيـّا أعـيـش معاكي
لـحد مـاتـحيـن آخرتي

ياما نفسي تبقي تملي جنبي
وف كل حتة تكوني قربي
تـنوّري بضيّـك طريقي
لاخـاف اتـوه في سكتي

بلاش بعادك يوم يطول
وحـبـّـنـا فـجأة يـزول
خايف تضيعي مرة مني
وتضيع معاكي بـسمتي

-

الخميس، 9 يوليو 2009

فـي الـوزارة الـمـوقـرة

-

فـي الـوزارة الـمـوقـرة

-

جالي وصاحبي في يوم إشارة
مبعوتة لينا من الوزارة
قالولنا : إنتم على الإدارة
كـمـُبرمجين
دارسين برامج تصميم كتيرة
وشـغـالين
فرشحوكوا عشان سفرية
لأولمبـياد
والسنة دي معمول في روسيا
في عشق اباد *
بينظموها بشكل سنوي
من كل حتة يجيلها ناس
وأملنا فيكم تجيبوا مركز
وان شالله حتى
تاخدولنا كاس
بصيت لصاحبي بابتسام
وعنينا مليانة بأمل
وافقنا طبعا بدون كلام
وبدأنا فورا نشتـغل

وع الوزارة سافرنا يوم
عـشان هنعرض شغـلنا
وبعد ما انضملنا تالت
لـقينا شلة زينا
نفس العـدد نفس الأمل
كان نـفسهم يتأهلوا
كانوا ولاد زي العسل
وحلمهم لو يوصلوا
وعرضنا فعلا كلـنا
واتفرجوا على شغلنا
وحدّدولنا معاد جديد
هنيجي نعرض تاني فيه
وكان سفرنا هناك بعيد
وبرضه قولنا : فيها إيه ؟؟

ولو .. نعاني
مادمنا طالعين السفر
وروحنا تاني
فقالـولنا الكل اتقبل
لإنهم طالبـين عددكم
وانتم عددكم اكتمل
وحددوا لينا المعاد
وقالولنا بـيكوا هـنـتصل
وبعد يوم انا كنت جاهز
وجوازي كان حتى اتعمل

امـّا البلد دي
بحثت عنها
عن معالمها
وكمان لغتها
أو عملتها
وكنت بحلم وكلي شوق
أطير هناك ويشوفوا شغلي
وبالي عمره ماكان يروق
تملي احسـّن كمان في عملي

قبل معاد السفر بيوم
بقيت مجهز كل الحاجات
مستني حد يقولي قوم
عشان نطير على أشجبات *
وبعد ساعة
وتاني ساعة
والليل عليـّا راح نزل
فقلت آه
شكل الجماعة
عايزين يخلوني اتهطل
مادام مفيش
مكالمة ليـّا
أنا اللي بيهم هتصل
واتصلت على الوكيل
قبل حتى ما اقول
سلام
قالي : أصله مستحيل
السفر يمشي
تـمام
مفيش فلوس
لجل السفر
ولا فيه عشانكوا
ميزانية
ودا هيمنع السفر
وتعوضوها
مرة تانية

يعني انتوا عايزيني
اقتنع
إن الفلوس قـليلة
بسببها سفري
اتمنع ؟؟
يعني الوكيل أو المساعد
ولاّ النيابة ولاّ المدير
أو حتى فراش الوزارة
ولا الوزير أو الكبير
كل الوزارة الموقـرة
مفيش معاها فلوس
عشان
يجيبولنا حق التذكرة ؟؟
وضيـّعولنا شغلنا
وجهدنا
وثقـتـنا فيهم اتمحت
واتزلزلت
وآمالنا فجأة اتحطمت
ودمـّرولنا حلمنا

فعلا عيوني دمعت
واتأثـّرت
لما الوزارة الموقـّرة
مش لاقية حق التذكرة
صعبوا عليا
والود ودي
أروح على باب الوزارة
أحط علبة
واللي يعدي
يتبرعوا لجل الإدارة
تقدر تعيش
وتعذب اكتر في
ولادها
وتدمر اكتر حلمهم
يبقى مفيش
فلوس تماما في
الميزانية
لكـنها في كرشهم

آه يا بلد
ياللي يعوز يصلحك
ويكبرك ويعظمك
تدمريه
واللي فسد
على المراتب والمراكز
وللفلوس أو للجوايز
تعينيه
لكن يا بلدي
مهما عملتي
أنا مش هلين
وهيـيجي يوم
أصلحك وانضفك
م الفاسدين
وقصتي هتنتهي
مع حد تاني
بشكل تاني
بنهاية تانية
والميزانية
في الوزارة الموقـرة
تسمح بحـق التـذكرة !!

-
* أشجبات : بالعربية : عشق أباد : مدينة في تركمانستان - إحدى دول الاتحاد السوفيتي السابق
-

الثلاثاء، 7 يوليو 2009

بـحـبــك يـا بــلـدي

-


بـحـبــك يـا بــلـدي


-


بحبـك بنـيـلـك وخيره الكـتـيـر

يفيض بالحضارة وتاريخ طويل

ويملا عروقي بعشقك يـا بـلدي

يطلع زروعك ويـشفي العلـيـل


بحبـك بـبحرك يغـني غـناوي

ويطرب بـعزفه مزاج كل غاوي

يـقلـّب بموجه صفح من تـاريخك

ويـكتـب بـزبـده أحلى الحـكاوي


بحبـك بـناسك أصالـة وشهامة

في كل الأماكن يـسيـبـوا علامة

يقولوا ان همـّا ولاد العراقـة

طباعهم مروءة وعزة وكرامة


بحـبك بـقـمرك منـوّر وزين

ينور بضيـّه في ليـلنا الحزين

بنلقاه يا بلدي على النيل يعوم

وفي ذكرياتنا يعيـش بالسنـين


بحـبك بـشمسك دفـاها ونورها

تقيد فـينا همة وعزيمة بشعاعها

وتـشرق مع صبح يومنا الجديـد

بتكشف همومنا وتخفي ضلامها


بحـبك وحبـك في قـلبي جبـال

وثابت مع سنين عمري الطوال

من اول ميلادي ليوم الممات

بحبك يا بلدي , يا أرض الجمال


بحـبك وحـبك في قـلبي سلاح

بيشعل في صدري نيـران الكفاح

يخليني ادافع عن اسمك بروحي

و ع اللي يسيئـلك ما يطلع صباح


بحبك وحبك في قـلبي أيادي

تعمّر وتبني في أرض بلادي

تعلي في مجدك وتزرع ترابك

ولما أموت .. يـكمـّـل ولادي


بحبك وحبك في قـلبي قـصايد

بتحيي سعادتـك في وقت الشدايد

وأوقات بـتـبقى عواصف زلازل

تـدمر وتعصف على كل فـاسد


بحبك وحبك في قـلبي سـفيـنة

بترسي معاكي في أي مـدينة

برغم العواصف ورغم السيول

ومهما حياتـنا تضيـّـق عليـنا


-