الاثنين، 25 مايو 2009

وطـن الـبـونـبـون

-

وطـن الـبـونـبـون

-

-

عــطــوة الســــواق

بـــيـكــلــم صبــيـه خـلّة :


غـــلا الـــبــنــزيــن

وعشانه غلت المواصلة


خـــمــسـة وتــلاتــيـن

يـتـدفعـوا من غير مفاصلة


ومـش راضيـيـن

يدفعوا خمسيـن ..

ومحـدش عاوز


قال إيه احنا نصابـين ،

طب قولي منين

هنجيب برايـز ؟


واد يـا خــلّـة ..

أنا جاتــلي حـتة ديـن فـكـرة


سيـدك ياض بقى سياسي

في بلدنا هيعمل حملــة


روح جري على عمك جمعة ،

هات منه علبة كرملّة


و اللي يعوز الباقي نديله

اللي احنا جايبينه بالجملة


و كمان شهر تبص تلاقي

البونبوني سعره بيغلا


ويحددوا أسعار للنكهة ،

فراولة بخمسة ومانجة بعشرة


ويشيلوا صورة الموزة

مكانها هيحطوا معالم الدولة


وغلافها هيخلوه طابع

يتلزق على ظرف مراسلة


والشحات هيجيله السكر

وهيجري يدور على شغلة


والبقال يكتب ع اليافطة ،

" هنا يوجد تغيير للعملة "

-

الاثنين، 4 مايو 2009

الـحلالـيف

-

الـحلالـيف

-

ترصد بعض نظم عالمية
أكبر نسبة للخنازير
نظراً لظهور إنفلونزا
قادرة تماماً ع التدمير
بعتوا بلدنا كام دكتور
لجل كتابة التقرير

***

راحوا ف حتة فقيرة كحيتي
شافوا أهلها إزاي عايشين
طلعوا ناس عدمانة تعبانة
عايشين عيشة زي الطين
من غير أكل ومن غير شرب
عايشين في بلدهم كالغرب
وان مرة يرفعوا أصواتهم
ما ينوبهم غير رعب ف رعب
علشان كدة دايما ساكتين
بأقل الأشياء راضيين
وان خلصت حتى الأشياء
باسوا إيديهم ع الوشين

***

راحوا ف حنة نظيفة عظيمة
ابراج ياما عليها القيمة
أصحابها أصحاب ملايين
بالغالي دايماً عايشين
من أموال الناس سارقين
و ف خيرات أرضنا ناهبين
ياخدوا فلوسنا يروحوا هاربين
تهريب ربا أو مرتشيين
أو حتى يتاجروا ف هروين
أو يشتروا أملاك الأمة
و بيعلوا و احنا النازلين

***

راحوا ف حتة بعيدة سودة
تدخل لكن مالهاش عودة
فيها الناس ماسكين حكومتنا
من غير عدل ومن غير دين
سابوا الفاسدين يلعبوا فيها
ويقفشوا في الوطنيين
كل يومين ينزلوا بقرار
و جابونا كلنا في الأرض
لبلدنا بيجيبوا العار
وماحدش خالص بيرد
عملوا جرايم قدام عينا
قتلوا وسرقوا ونهبوا ف خيرنا
عذبوا فينا لما عارضنا
بالتزوير دمروا في أملنا

***

البعثة كتبوا التقرير
في بدايته عملوا تحذير
قالوا إن الإنفلونزا
ممكن تنمو بشكل خطير
كتبوا فيه " يا لطيف يا لطيف ! "
الكمية عددها مخيف
قالوا إن بلدنا دي فيها
أكبر نسبة من الحلاليف

-