الاثنين، 4 مايو 2009

الـحلالـيف

-

الـحلالـيف

-

ترصد بعض نظم عالمية
أكبر نسبة للخنازير
نظراً لظهور إنفلونزا
قادرة تماماً ع التدمير
بعتوا بلدنا كام دكتور
لجل كتابة التقرير

***

راحوا ف حتة فقيرة كحيتي
شافوا أهلها إزاي عايشين
طلعوا ناس عدمانة تعبانة
عايشين عيشة زي الطين
من غير أكل ومن غير شرب
عايشين في بلدهم كالغرب
وان مرة يرفعوا أصواتهم
ما ينوبهم غير رعب ف رعب
علشان كدة دايما ساكتين
بأقل الأشياء راضيين
وان خلصت حتى الأشياء
باسوا إيديهم ع الوشين

***

راحوا ف حنة نظيفة عظيمة
ابراج ياما عليها القيمة
أصحابها أصحاب ملايين
بالغالي دايماً عايشين
من أموال الناس سارقين
و ف خيرات أرضنا ناهبين
ياخدوا فلوسنا يروحوا هاربين
تهريب ربا أو مرتشيين
أو حتى يتاجروا ف هروين
أو يشتروا أملاك الأمة
و بيعلوا و احنا النازلين

***

راحوا ف حتة بعيدة سودة
تدخل لكن مالهاش عودة
فيها الناس ماسكين حكومتنا
من غير عدل ومن غير دين
سابوا الفاسدين يلعبوا فيها
ويقفشوا في الوطنيين
كل يومين ينزلوا بقرار
و جابونا كلنا في الأرض
لبلدنا بيجيبوا العار
وماحدش خالص بيرد
عملوا جرايم قدام عينا
قتلوا وسرقوا ونهبوا ف خيرنا
عذبوا فينا لما عارضنا
بالتزوير دمروا في أملنا

***

البعثة كتبوا التقرير
في بدايته عملوا تحذير
قالوا إن الإنفلونزا
ممكن تنمو بشكل خطير
كتبوا فيه " يا لطيف يا لطيف ! "
الكمية عددها مخيف
قالوا إن بلدنا دي فيها
أكبر نسبة من الحلاليف

-

هناك تعليق واحد:

  1. ولكن الشئ العجيب المريب الغريب الذى لا يصل للعلم بَصَلة وليس له تفسير منطقى

    ان الخبراء اثبتوا ان:: الفيرس قد جاء الى مصر وتحور فقد اخذ حصانة ضد جميع الامصال؟ّ!!!

    وليس هناك باقوى من الحصانة المصرية....

    وشعر جامد والاجمد منه النهاية صحيح..

    يا لطيف يا لطيف ,,,بلدنا دي فيها
    أكبر نسبة من الحلاليف


    ولا انسى ان كلمة الحلوف لها اكثر من معنى فهى قد تنطبق على الحيوان او على ال....

    ردحذف