الأحد، 14 يونيو 2009

مـش زيّ بـلدي

-

مـش زيّ بـلدي

-

يا بلاد مش زي بلدي
فين نلاقي شمسنا
فوق أراضي مش هي أرضي
قولي إيه جابنا هنا

قولتي ليه ان انتي وطني
وانتي شقلبتي حياتي
هو لازم أبقى وطني
لما أخرج عن صراطي !

لما اغير في مبادئي
لما أكتم فيك يا صوتي
ياللي بتحققلي حقي
واللي بترجعلي قوتي

يا بلادي على حد قولك
ليه شبابك تحبسيهم
ليه تقطـّفي في زهورك
ليه تملي تـقـتـّليهم ؟

ليه معاندة تبقي أفضل
ليه ممانعة الخير في أرضك ؟
دول شبابك مهما يحصل
نفسهم يبنوا في مجدك

لكن انتي خدتي حقوقهم
وخفتيهم م العيون
لما راحوا يعلوا صوتهم
حطتيهم في السجون

يا بلاد النور مطفي
إمتى نورك راح ينوّر ؟
إمتى نور الشمس تخفي
كل ضلمة .. وحقي يظهر ؟

-

الجمعة، 5 يونيو 2009

محتــار بـِـحبـّـك

-

محتــار بـِـحبـّـك

-

ليه ياحبي ف كل حتة
ألاقي صورتك
واما انادي أي حد
انده باسمك ؟؟
وتملـّي يسألوني
ع اللي شاغل كل بالي
أصل باين في عيوني
حيرتي مع طول انشغالي
قولي إيه جواك آسرني
ومحاصر كل فكري ؟؟
قولي ليه بعينك ساحرني
وف إيديك انا كل أمري ؟؟

*
خايف انك يوم تسيبني
والبعاد يصبح حقيقي
بعد ما نورك كشفلي
كل حاجز في طريقي
بعد ما لقيت اللي بحلم بيه
سنين عمري اللي ضاع
خايف انك يوم تجيلي
تقولي كلمة الوداع

*
أو أكون خايف أحبك
وانسى نفسي في هواك
وأموت في بعدي عنك
وحياتي تكون معاك
وفداك انا أنسى نفسي
وأسلم عمري ليك
وأضحي بكل حاجة
لجل بس أشوف عينيك

*
ليه بقيت مهووس بحبك
وبقيت مجنون بصوتك
كل يوم انا في انتظار
نفسي لحظة بس اشوفك
ليه بقيت مهموم تملي
ع الحالة دي ليل نهار
يا اللي خليت بالي سارح
وحبك خلاني احتار

-

الخميس، 4 يونيو 2009

خــطـاب الريـّـس

ـ

خــطـاب الريـّـس

-

قول يا معلم إني حمار

وما بفهمش ف أي قرار

ولا داري بمواضيع حساسة

ولا عارف إيه معنى سياسة

-

لكن قول بالذمة يا راجل

لما أوباما ادالنا خطاب

شوفت ازاي كان واقف واعي

شدنا بكلامه الجذاب

عايز تمشي, ونفسك تقعد

مش راضي إنه يتساب

فكره مرتب, عرضه منظم

كل كلام معموله حساب

-

لما بقى الباشا يتكلم

لازم هتفوته وتقوم

وان حصّلت تكمل نصه

يكبس على عينك النوم

علشان منه تتوه تتلخبط

بكلامه المش مفهوم

هو أساسا ذاته مش فاهم

ولا عارف إيه جابه اليوم

-

الله يجازي اللي ف بالي

خلى حياتنا ملل طوالي

فين الصرخة تهز كياننا

وتسهرنا ايام وليالي

فين الكلمة اللي تحمسنا

وتوصّل أمجادنا لعالي

فين القائد ياخد إيدنا

ونطور في بلدنا الغالي

-