الاثنين، 18 أكتوبر 2010

جــدّي

-

جـدّي

-

الضهر لما اتـّنى، والفرع صار دبلان
والعمر عدا هوا، والجسم بقى عيان
والرجلتين وهنوا، والتالتة سانداهم
كل السنين ضاعـت، والصحة وياهم
بين كل ساعة دوا، والجرح عمره ما طاب !!
بين كل كلمة آه .. بين كل فرح عذاب
هم الحياة مكتوب على جدي فوق ف جبينه
فجأة المرار بيدوب، والفرحة باينة ف عينه
وان مرة دمعه نزل زي المطر مصبوب
بعد الدموع ع الخد قوس المطر مقلوب
جدي ف قلبه حنان، تلقى ف حضنه أمان
وف صدره نقش الرضا، والحمد للمنان

-

بيت جدي فيه مليون ذكرى، وألف حكاية
زيطة ولمة وهيصة .. صوت فرحة صوت ضحكاية
وعتبته تاسع باب للجنة جوة الدنيا
بتخطي بابه بتنسى كل الكآبة ف ثانية
والسطح شايفه امتار، وف بالي فاكره ساحات
بلعب عليه بالكورة وانط واجري ساعات
فيه بلقى كل حبايبي .. نتلم لمة خير
حتى الكلام بياخدنا، ويطب فجأة الليل
بيت جدي فيه البركة منقوشة على جدرانه
بيت جدي فيه الطيبة محفورة بين أركانه
فيه أجمل الأيام .. فيه الليالي زمان
بيت جدي لوحة زيت غرقانة بالألوان

-

بين ميت قرار وقرار جايبالنا ذل وعار
بين ميت مصيبة وكارثة بتقيد صدورنا نار
والناس ف عرض الشارع ماشية تقول ف شتايم
ماشية تسب وتلعن تدعي كمان ع العالم
بين ألف أزمة وأزمة .. بين هم غم وزحمة
بين صوت خناق ومشاكل لما بتغلا اللحمة
بين نصب سرقة ورشوة، وناس تملي يغشوا
وجدي هادي وراضي، والضحكة برضه ف وشه
حاسس صلاح هيطل ما بين فساد وفساد
والمولى خيره يهل؛ عمره ما ينسى عباد
جدي ف صدره إيمان .. والكل صار كفران
جدي ف عينه آمال .. والكل صار عميان

-

الخميس، 30 سبتمبر 2010

ابـن فـلان

-

ابـن فـلان

-

بفرح لما ينادوا ف اسمي
واسمع اسمك ييجي وراه
واما اخاف أو يكبر همي
الاقيك جنبي تداوي الآه
زي الشجرة جدورها امتار
واقفة وثابتة ف ليل ونهار
لكن لما جدورها تشيلها
تلقى الشجرة ما فيها حياة

إيدك خشنة بتفضل تشقى
لكن فوق الخد حرير
حضنك دافي وياما اتمنى
جوة الحضن تاخدني أسير
فرحك بينا طريق للجنة
كل همومك حالنا ومالنا
واما بنطلب حاجة عشانا
ف غمضة عينا أوام نلقاه

منك كانت اول مرة
أعرف معنى الصدق وفضله
وان حياتي لبلدي وديني
ولازم اضحي بعمري لأجله
انت صلاح وعمار لبيوتنا
شمس تنور في ملكوتنا
أملي تعيشلي العمر يا والدي
وانجز كل ما تتمناه

ازاي ممكن ارد جمايلك
أصل جمايلك مالهاش حد
مين ف الكون دا يحبني قدك
حتى ف ربعك مالقاش حد
ياللي شقيت علشانه ليالي
واللي قلقت ف شدة حالي
شعري ف حبك كدة على قدي
شايل معنى الشكر معاه

-

الاثنين، 22 مارس 2010

بيـن أحـضانـها

-

بيـن أحـضانـها

-

احمد ربك إنك عايش
بين أحضانها
باقية وصابرة ودايقة الهم
وشاربة مرارها
ضحكة عينك تمحي همومها
واما بتزعل تلقى دموعها
ينزل دمعك بعد ما ينزل
سيل ف عيونها

احمد ربك إنك عايش
بين أحضانها


شوف كام أم ف قدسنا عايشة
حاسة ضناها ومش شايفاه
قالت يمكن بقى م الشهدا
بين كام جثة مش لاقياه
يقدر قلبك يوم يتصور
نار ف فؤادها تملي بتكبر
لما تشوف ف عيونها الضلمة
ف عز نهارها ؟؟

احمد ربك إنك عايش
بين أحضانها


شوف كام ابن ف قدسنا عايش
حاسس همه
انهار بيته، ووسط حطامه
ادفنت أمه
واما جه يطلب حب شقيقه
خانه وسابه ف نص طريقه
سابه بيبكي ف أنقاض بيته
على أطلالها

احمد ربك إنك عايش
بين أحضانها


شوف كام شخص ف أرضنا عايش
أمه باررها
لما عدوه سرقها وقاعد
يشرب خيرها
تنده، نسمع، مش بنلبي
جبن مالينا ومش بنخبي
كلنا عاق، وماحدش أبداً
ضحى عشانها

رغم ان انت عمرك عايشه
بين أحضانها

-

السبت، 30 يناير 2010

طول ما احنا واحد

-

طول ما احنا واحد

-

عرفـتـك بكلمة قاريها في غنوة
وقصة بتحكي التاريخ الطويل
وشفتك ف مبنى، سمعتك ف مدنة
يا زينة الصبايا، يا بنت الأمير '
يا شرشال مغطي بخضرة ومية
يا وادي يا دهبي يا أرض النخيل ''
عرفـتـك باسمك عروبة وأصالة
عرفـتـك بنجمة وحاضنها الهلال

عرفـتـك بصورتك في لونك علمنا
يا خضرا يا قمرة يا حمرا بدماكي
عاصينا دينارك، وطارقـك صلاحنا
سلامك سلامنا، ونيلنا سيقاكي '''
شعوبنا حبايب فراعـنة وفـناقـوة
دا دمـّـك دمانا ومليان هواكي
لآخر زمانــّا بلادك بلادنا
ومهما تفـرّق ما بينــّا جبال

عرفتك جميلة يا رمز المقاومة
معاندة وصامدة وعزمك شديد ''''
وباقية ورافضة المهانة في أرضك
برغم المدابح ومليــون شهيـد
يا وردة تغني وتمحي همومنا
بحسني وخالد ومامي ورشيـد '''''
وفرعون ومُـفـدي وحداد وغيرهم
قـلمهم يلـوّن سواد الاحتلال ''''''

ما يقطع ما بينــّا شوية عيال
مابينــّا دا أكبر كتير م الصغاير
متوشة وكورة عليهم نشاجر
وناس أرزقية بوطنها تتاجر
لآخر زمانــّا هـنـفضل شقايق
وقلبي هـيفضل بنقـش الجزاير
وطول ما احنا واحد هنقـدر نعدّي
يهون التحدّي، يزول المحال

-

' - الأمير عبد القادر الجزائري، مؤسس الدولة الجزائرية الحديثة

'' - شرشال، مدينة جزائرية تاريخية
- الوادي، مدينة جزائرية مشهورة بإنتاج التمر

''' - عمرو بن العاص وأبو المهاجر بن دينار، فاتحا مصر والجزائر
- طارق بن زياد وصلاح الدين الأيوبي، القائدان المسلمان العظيمان
- وادي سيق، مصدر مائي مهم بالجزائر

'''' - جميلة بوحيرد، بطلة مقاومة الاستعمار الفرنسي

''''' - وردة الجزائرية، مطربة جزائرية معروفة
- شاب حسني وشاب خالد وشاب مامي ورشيد طه، من كبار مغنيي الراي الجزائري

'''''' - مولود فرعون ومفدي زكريا ومالك حداد، من كبار الكتاب والشعراء في الجزائر

-

الثلاثاء، 12 يناير 2010

أخويــا مــات !!

-

أخويــا مــات

-

بعد المفارقة والشتات
وبعد منــّه بالهبات
ولجل ما يرضي الأعادي
راح مقطع ف الصلات

مديتله إيدي قام قاطعها
ومساعداته راح مانعها
صرخات ولادي كان سامعها
لكنه قاعد من سكات

كان هو ليـّا اقرب ملاذ
حلـفته بالعرب العزاز
فراح حاصرني بالفولاذ
حرّم عليا اقوله هـات

ماكفهوش ف رقبته عار
وسنين تخاذل وانهيـار
وبرضه أسس في الجدار
وهمـّه تحقيق الغايات

ماكـفهوش فيـّا الجراح
وسلام مغطـيه السلاح
ولا اللي راح ويـّا اللي راح
أرواح وضاعت بالمئـات

خلا الحصار فيـّا حلال
جوعي وخوفي كمان حلال
وحتى دمّي بقى حلال
دي الفتوى صبحت بالمزاجات

إن كان عليـّا الوضع عادي
ما ياما منه شافت بلادي
ولمـّا ضربونا الأعادي
ما سمعت منه الا السكات

أنا ببكي بس ع الأخوة
وقلوب ماعاد فيه مروّة
ويقول عروبة مع إن هوّه ..
عميل وراكبـينه الخواجات

ويقولك انه تملي خادمني
ولا مرة عمره باع وخذلني
وف وقت حاجتي بـيـيجي يعيني
مع إنه عايـش ع المعونـات

بجراحي انادي سنيـن كـتيـر
ولا لبّى يوم ومفيش تغـيير
ماقدرش اقول الوقتي غيـر
أخويــا مــات !!!

-