الأربعاء، 13 يوليو 2011

احلـم على كيـفك

-

احلـم على كيـفك

-

طير ويا حلمك فوق
واحلم على كيفك
لو سبت يوم الحلم
الهم كان ضيفك
وان قلت بتخرف
أحلام بتتحرف
يمكن ف يوم تحصل
وتشوف تخاريفك

يا حلم بتخلي
شكل الحياة بساتين
خليتني اعيش عمري
نفس الحياة عيشتين
خليتني اطير وياك
وأروح هنا وهناك
عشت بخيالي معاك
وعشقت تأليفك

ارسم بحلمك أمل
جوة العيون صورة
وازاي تطول السما
بعزيمة مكسورة
دا اما انقطع دربك
والهم كان كاربك
واما الزمن حاربك
الحلم كان سيفك

اوعى تقول ماخلاص
والصورة تتمزع
الشمس مش بتغيب
لكن بتتوزع
قدف وشق بحور
بكرة عليك الدور
واوعى ف يوم الموج
يكسر مقاديفك

طير ويا حلمك فوق
واحلم على كيفك

-

التـحقيـق

-

التحقيق

-

ﺷﻴﻞ ﺇﻳﺪﻳﻚ ﻣﻦ ﺟﻴﻮﺑﻚ ﻭﺍﺗﻌﺪﻝ..ﺑﺼﻠﻲ ﻭﺍﻗﻒ ﻋﺪﻝ
ﺍﻟﻠﻲ ﺯﻳﻚ ﻣﻦ ﺯﻣﺎﻥ ﻛﺎﻥ ﺍﺗﺴﺠﻦ..ﺍﺗﻌﺪﻡ..ﺟﻨﺐ ﻇﻠﻤﺔ ﻳﺘﺪﻓﻦ
ﺍﻓﺘﺢ ﺍﻟﻤﺤﻀر..ﺣﻂ ﺍﺳﻤﻪ ﻭﺍﻟﺴﻜﻦ
ﺗﻬﻤﺘﻪ..ﺳﺮﻗﺔ ﻭﻃﻦ ﺑﺎﻋﻪ ﻣﺎﺩﻓﻌﺶ ﺍﻟﺘﻤﻦ
ﺗﻬﻤﺘﻪ ﺳﺮﻗﺔ ﺯﻣﻦ ﻣﻦ ﺣﻴﺎﺗﻨﺎ ﻭﻋﻤﺮﻧﺎ
ﻟﻤﺎ ﺩﻣﺮ ﺣﻠﻤﻨﺎ..ﺧﻼ ﺃﺑﺴﻂ ﺣﻘﻨﺎ ﺷﻲﺀ ﻣﺤﺎﻝ
ﺗﻬﻤﺘﻪ..ﻗﺘﻞ ﺍﻟﺮﺟﺎﻝ ﺍﻟﻠﻲ ﻛﺎﻧﻮﺍ ﺑﻴﺤﻠﻤﻮﺍ ﻳﺒﻨﻮﺍ ﺍﻟﻮﻃﻦ
ﺳﻴﻦ ﺳﺆﺍﻝ..
ﻗﺪ ﺇﻳﻪ ﺍﻟﻠﻲ ﺃﻛﻠﺘﻪ ﺑﺎﻟﺤﺮﺍﻡ؟؟ﻭﺍﻟﻠﻲ ﻗﻠﺖ ﻋﻠﻴﻪ ﺣﻼﻝ؟؟
ﻭﺍﻟﻠﻲ ﻧﺎﻫﺒﻪ ﻣﻦ ﺟﻴﻮﺑﻨﺎ ﺑﺎﻟﺘﻼﻝ؟؟
ﻗﺪ ﺇﻳﻪ ﺍﻟﻠﻲ رميتهم ﺑﺎﻟﺮﺻﺎﺹ؟؟ﻭﺍﻟﻠﻲ ﺣﻠﻤﻮﺍ ﺑﺎﻟﺨﻼﺹ؟؟
ﻗﺪ ﺍﻳﻪ ﺍﻟﻠﻲ ﺭﻣﻴﺘﻬﻢ ﻑ ﺍﻟﺴﺠﻮﻥ؟؟
ﺃﻭ ﺭﻣﻴﺘﻬﻢ ﺑﺎﻟﺠﻨﻮﻥ؟؟
ﻭﺍﻟﻠﻲ ﺗﺒﻜﻴﻠﻪ ﺍﻟﻌﻴﻮﻥ ﻡ ﺍﻟﻌﺬﺍﺏ؟؟
ﺭﺩ ﺟﺎﻭﺏ ﺑﺎﻟﺤﻘﻴﻘﺔ...ﺃﺻﻞ ﺩه ﻳﻮﻡ ﺍﻟﺤﺴﺎﺏ
ﺟﻴﻢ ﺟﻮﺍﺏ..
ﻫﺶ..ﺇﺧﺮﺱ..ﺇﻭﻋﻰ ﺗﻬﻤﺲ..ﺇﻧﺖ ﻭﺍﺣﺪ ﻣﺘﻬﻢ
ﻭﺍﺣﻨﺎ ﺷﺎﻫﺪ..ﻭﺍﺣﻨﺎ ﻗﺎﺿﻲ..ﺷﻌﺐ ﺑﺈﻳﺪﻳﻚ ﺍﺗﻈﻠﻢ
ﺟﻴﻢ ﺟﻮﺍﺏ..
ﺟﻴﻢ ﺟﺮﺍﻳﻢ ﻓﻴﻨﺎ ﻭﺍﺣﻨﺎ ﺷﻌﺐ ﻳﺎﻣﺎ ﺷﺎﻑ ﻭﺩﺍﻕ
ﺟﻴﻢ ﺟﺮﺍﻳد ﻛﺎﺗﺒﺔ ﻋﻨﻚ ﻛﻞ ﺁﻳﺎﺕ ﺍﻟﻨﻔﺎﻕ
ﺟﻴﻢ ﺟﻨﺎﺯﺓ ﻋﺪﻝ ﻋﻤﺮﻩ ﺟﻮﺓ ﻋﻬﺪﻙ ﻳﻮﻡ ﻣﺎ ﻋﺎﺵ
ﺟﻴﻢ ﺟﻮﺍﺯﺓ ﻣﺎﻝ ﻭﺳﻠﻄﺔﺑﺲ ﻟﻴﻪ ﻣﺎﻋﺰﻣﺘﻨﺎﺵ
ﺟﻴﻢ ﺟﻨﻮﺩﻙ ﺳﺮﻗﻮﺍ ﺻﻮﺗﻨا ﺗﺤﺖ ﺭﺍﻳﺎﺕ ﺍﻟﻬﻼﻝ
ﺟﻴﻢ ﺟﺮﺍﺩﻙ ﻧﻬﺒﻮ ﻗﻮﺗﻨﺎ ﻗﻬﺮ ﻋدّﺍ ﺍﻻﺣﺘﻤﺎﻝ
ﺟﻴﻢ ﻑ ﺟﻮﻉ ﺭﺑﻴﺘﻪ ﻓﻴﻨﺎ ﻫﻤﻨﺎ ﺃﻛﻞ ﺍﻟﻌﻴﺎﻝ
ﺟﻴﻢ ﺟﺸﻊ ﺳﺎﻛﻦ ﻑ ﻗﻠﺒﻚ..ﺟﻴﻢ ﺟﺮﺍﺣﻨﺎ..ﺟﻴﻢ ﺟﻤﺎﻝ
ﻳﺎ ﺷﺎﻭﻳﺶ..
ﺣﻄﻪ ﻑ ﺍﻟﺤﺠﺰ ﺍﻟﻠﻲ ﻋﻨﺪﻙ ﺯﻳﻪ ﺯﻱ ﺍﻟﻤﺠﺮﻣﻴﻦ
ﺑﻴﻨﻨﺎ ﻳﻮﻡ ﻣﺶ ﺭﺍﺡ ﻳﻌﻴﺶ
ﻳﺎ ﺷﺎﻭﻳﺶ..
ﺣﻄﻪ ﻑ ﺍﻟﻀﻠﻤﺔ ﻟﻮﺣﺪﻩ ﺯﻱ ﻗﻠﺒﻪ ﻋﺘﻤﺔ ﻭﺍﻹﺣﺴﺎﺱ ﻣﻔﻴﺶ
ﻳﺎ ﺷﺎﻭﻳﺶ..
ﺍﻟﻨﺎﺱ ﺩﻱ ﻓﺎﺟﺮﺓ ﻓﺎﻛﺮﺓ ﻫﻴﻨﻮﺑﻬﺎ ﺍﻟﺨﻠﻮﺩ
ﺑﻌﺪ ﻣﺎ ﺗﺘﻢ ﺍﻟﻤﺤﺎﻛﻤﺔ ﻋﺪﻟﻨﺎ ﻻﺯﻡ ﻳﺴﻮﺩ
ﻳﻌﺮﻑ ﺍﻟﻜﻞ ﺍﻥ ﻣﻬﻤﺎ ﻛﻨﺖ مش ﻓﻮﻕ ﺍﻟﻘﺎﻧﻮﻥ
ﻭﺍﻥ ﻃﻮﻝ ﻣﺎ ﺍﻟﺸﻌﺐ ﻋﺎﻳﺶ ﺣﻘﻨﺎ ﻣﺶ ﺭﺍﺡ ﻳﻬﻮﻥ
ﻭﺍﻥ ﻋﻤﺮ ﺍﻟﺸﻌﺐ ﻃﺎﻳﻞ ﻃﻮﻝ ﻣﺎ ﺑﻴﻄﻮﻝ ﺍﻟﻮﺟﻮﺩ
ﻭﺍﻥ ﺣﻠﻢ ﺍﻟﺸﻌﺐ ﻃﺎﻳﺮ ﻑ ﺍﻟﺴﻤﺎ ﻋﺪﺍ ﺍﻟﺤﺪﻭﺩ
ﻋﻤﺮ ﻣﺎﺗﺼﺪﻩ ﺳﺪﻭﺩ
ﻳﺎ ﺷﺎﻭﻳﺶ..
ﻣﺎﺗﺴﻴﺒﻪ ﻳﺒﻜﻲ ﻉ ﺍﻟﻠﻲ ﺻﺎﺭ ﻣﻦ ﺗﺤﺖ ﺇﻳﺪﻩ
ﺳﻴﺒﻪ ﻳﺒﻜﻲ ﻳﻘﻮﻝ ﻳﺎ ﺭﻳﺘﻨﻲ ﻧﺪﻣﻪ ﻋﻤﺮﻩ ﻣﺎ ﺭﺍﺡ ﻳﻔﻴﺪﻩ
ﻧﺎﺳﻲ ﺍﻥ ﺍﻟﺸﻌﺐ ﻓﻮﻗﻪ ﻫﻮ ﺃﺻﻠﻪ ﻭﻫﻮ ﺳﻴﺪﻩ
ﻧﺎﺳﻲ ﺇﻥ ﺍﻟﺤﻖ ﺑﺎﻗﻲ ﻭﺍﻧﻪ ﻻﺯﻡ ﻳﻮﻡ ﻳﻌﻮﺩ...
ﻧﺎﺳﻲ ﺇﻥ ﺍﻟﺤﻖ ﺑﺎﻗﻲ ﻭﺍﻧﻪ ﻻﺯﻡ ﻳﻮﻡ ﻳﻌﻮﺩ...

-

الجمعة، 11 مارس 2011

من قـزم .. لـسنـووايت

-

من قـزم .. لـسنـووايت

-

بياض التلج ف ديسمبر
وريحة المسك والعنبر
وقلبي بمين هيتصبر
وزيك حد مش لاقي

بشوف ف عينيكي ضي البدر
سكون الليل ف لون الشعر
وبتغزل وبكتب الشعر
وخلصت فيكي أوراقي

صحيح فيه ستة مني كمان
لا عندي جاه ولا سلطان
لا عندي مال ولا أطيان
ولا شكلي يسر العين

لكن قلبي الضعيف حبك
بيرقص لما اكون جنبك
ولو عاش الحياة ف بعدك
يعيش العمر كله حزين

أميرك مش لازمله تاج
وقلبك عمره يوم ما احتاج
يكونله م الدهب أبراج
ويتغطى حرير ف حرير

أميرك تاجه فوق قلبه
وجوة عيونه مين حبه
ولو تبقي ف يوم قربه
يرفرف م الفرح ويطير

مفيش بوسة بتحيي الناس
لكن فيه صدق فيه إخلاص
يصحي ف القلوب الإحساس
ويكتب للمحبة حياة

ف عين الناس حقير وفقير
لكن حبي يسوي كتير
يخليني ف عينيكي أمير
وأكتر م الملك ف غناه

معنديش سلطة تعميني
معنديش مال يغطيني
واضحي بعمري وسنيني
واشوف الضحكة ف خدودك

وليه يا حبيبتي تحتاري
وصعب ان انتي تختاري
مابين فرحي وبين ناري
وقلب حياته ف وجودك
-

الاثنين، 21 فبراير 2011

فارق عروشك

-

فارق عروشك

-

فارق عروشك واستعد لحكمنا

لا صوت يعلو اليوم عن أصواتنا

لا حكم إلا للشعوب وربها

ولست ربا أو إلها عندنا

إذ هان شعبك أن يموت فداءك

فيهون حكمك بعد تسعين سنة

قد هان شعبك أن ترى أشلاءه

قد كبر عندك أن تراه آمنا

أتبيد شعبا كي تظل بحكمه ؟؟

أتريق دمه حتى يفديك الدم ؟؟

خذ في اعتبارك جثة قد مزقت

لم يبق منها إلا وجها باسما

يامن جعلت الدين زيا كاذبا

أأمرت جندك أن يقاتل مسلما !!

وصلبت من ترك الإله الزائف

وقطعت أيدي الزاهدين عن الدنى

فارق عروشك لست منا أو لنا

لسنا عبادك ولن تصير وليا

أوهمتنا أنا بعير سيادتك

وركبتنا وظهورنا محنية

علمتنا أن الرئيس "مباركا"

و"معمرا" في حكمه و"عليا"

اكشف وجوه نفاقك المتعددة

أزل ستار الكذب فوق عيوننا

فرعون إن جزاءك قد سجل

بكل قصص الظالمين كتابا

قد قبح عملك والجزاء مقدر

والنار آخرتك وبئس مآبا

إنا نفيق اليوم من أكفاننا

لانخشى قتلا أو نخاف عذابا

ان كنت ترجو أن تظل القائد

أبد شعوبك وسر على أجسادنا

-

الثلاثاء، 8 فبراير 2011

فوق الراس - إهداء لشهداء الثورة

-

فوق الراس

-

للدرجة دي ؟؟

إحنا حثالة ما بين الناس

كل اقوالنا ما ليها أساس ؟؟

لما نشيل فوق راسنا همومنا

يبقى جزاتنا قطع الراس ؟؟

واما ننادي لجل حقوقنا

ماينوبناش غير ضرب رصاص

للدرجة دي ارواحنا رخيصة

للدرجة دي إحنا رخاص ؟؟

لما مناضل ينطق كلمة

يكشف بيها حقوق، يتداس

واما الأمن بيقتل فينا

وسط عيون الناس، يتباس

لأ ويعبوا كلام مضروب

إن القتلة إيران وحماس

شفنا دمانا ف أرض بلدنا

فوق السنجة وفوق الفاس

شفنا يا ريس

شفنا عصابتك وانت يا ريس

فرعون يتحامى ف حراس

شعبك شاربك عاجنك خابزك

مهما تحطه ف الاقفاص

شيلنا الصورة وشفنا العورة

وحش ف صدره مفيش إحساس

مش راح ننسى حق الشهدا

مكتوب باحمر في الكراس

بكرة ارواحنا اشباح ف كابوسك

نار ما تلاقي منها خلاص

واللي يموت م الشهدا ف جنة

لبسه حرير، وعقود ألماس

إحنا بندعي عليك، وعليهم

قايمة صلاتنا والقداس

واللي يموت م الشهدا .. ماماتشي

جوة قلوبنا، وفوق الراس

-

الأحد، 6 فبراير 2011

محاكمة الريـّـس

-

محاكمة الريـّـس

-

عشت عمري طول بعرض
شفت ناس من كل أرض
عمري ما لقيت بالغلاسة
زي دوت أي حدّ
شعبه صوته راح بيهتف
بس هو ليه يرد ؟؟
فاكر انه السيد وشعبه
الاسمراني لسة عبد

خلا دمّك يغلي بيك
خوفك كبّل إيديك
حط بيننا البلطجية
خلا صاحبك شك فيك
خوفه كله لجل نفسه
عمره مايخاف يوم عليك
واما نفتح في طريقنا
سكة أمنه يروح يسد

ليه تخلي بلادنا غابة ؟؟
ليه تسيبنا للديابة ؟؟
ياللي ناهب مليارات
ليه بتحكم ف الغلابة ؟؟
خاف وإعرف إن إنت
في سمانا يا دوب سحابة
إنت رايح .. إنت زايل
بس شعبك عيشته خلد

اتفضحت خلاص يا خيبتك
بان لكل الشعب عيبتك
دا انت زورت اختيارنا
مش هتخدعنا بطيبتك
واللي راح م الشهدا لازم
يبقى حقه فوق رقبتك
إحنا روحنا مش رخيصة
إحنا ناس فايقين بجد

إحنا سيل دبابير يقرص
حل عنا أوام وخلص
شعبنا اللي كنت راكبه
من سنين .. قاعد يرفص
مش هنرجع ليك نطاطي
يا مبارك يا ---ّ-
قلبنا مليان بكرهك
صدرنا بيفيض بحقد

شفنا في حكمك مهازل
تحت، يتهان المناضل
فوق، فيه ناس ماشية بشرفها
فاتحة إيدها، لمين يبادل ؟؟
لو مش احنا راح نحاكمك
لينا رب واسمه عادل
اللي عنده الحق فاضل
واللي عدله ماله حدّ

-