الخميس، 4 يونيو، 2009

خــطـاب الريـّـس

ـ

خــطـاب الريـّـس

-

قول يا معلم إني حمار

وما بفهمش ف أي قرار

ولا داري بمواضيع حساسة

ولا عارف إيه معنى سياسة

-

لكن قول بالذمة يا راجل

لما أوباما ادالنا خطاب

شوفت ازاي كان واقف واعي

شدنا بكلامه الجذاب

عايز تمشي, ونفسك تقعد

مش راضي إنه يتساب

فكره مرتب, عرضه منظم

كل كلام معموله حساب

-

لما بقى الباشا يتكلم

لازم هتفوته وتقوم

وان حصّلت تكمل نصه

يكبس على عينك النوم

علشان منه تتوه تتلخبط

بكلامه المش مفهوم

هو أساسا ذاته مش فاهم

ولا عارف إيه جابه اليوم

-

الله يجازي اللي ف بالي

خلى حياتنا ملل طوالي

فين الصرخة تهز كياننا

وتسهرنا ايام وليالي

فين الكلمة اللي تحمسنا

وتوصّل أمجادنا لعالي

فين القائد ياخد إيدنا

ونطور في بلدنا الغالي

-

هناك 5 تعليقات:

  1. فى البداية جامدة جدا يا احمد وانا معاك فان الفرق ضخم بين الاتنين ومفيش اى وجه للمقارنة
    لكن بالنسبة لعمك اوباما ,,
    فانا مش معاك فى الحكاية ديه صحيح هوا اكلم كلام زى العسل لاكن متنساش انه لسه جديد عالكرسى وعايز يكسب الناس فى صفة ومسيره يرجع تانى للطريق المعتاد بتاع اللى سبقوه
    وانا رأيى بقى ان منحطش عليه امل كبير لانه لسه جديد وكتفه ميستحملش
    وكمان اوباما وجه كلمه مهمه لعمك الاولانى وهيا
    ::اود ان اتحدث عن الديموقراطية كقضية رابعة
    والحاجةالعجيبة اللى انا استغربتلها فى الخطاب انه كان ساعة تقريبا منهم تلت ساعة تصفيق وربع ساعة تصفير الا لامؤاخذة مين اللى كان بيصفر ده
    المهم مش موضوعنا لا بس بجد جامدة جدا يا احمد وعايزك تدى واحدة كده فى اللى حصل لعمرو خالد ..
    لان الموضوع ده هبل و محتاج ثورة لان كل حاجة بقت ماشية الاياميدى كوسة والسلام بس شعر ملوش حل يابنى.....

    ردحذف
  2. أنا بكتب بس عن طريقة الخطاب , خلي بالك من أول القصيدة
    أوباما في كلامه فيه وقفات كتيرة , بس أنا بجيب بس طريقة العرض
    وشكرا يا مان

    ردحذف
  3. العفو يا صاحبى وربنا يجازى اللى فبالك واللى فبالى لانه معدش حد قادرله وطول اوى واحنا بصراحة زهقنااااااااااااا..

    ردحذف
  4. طب اقابلك بكرة بقى في ابو زعبل :)

    ردحذف
  5. هههههههههه يابنى احنا ميهمناش ابو زعبل او جوانتانمو مع انى بسمع ان هوا اتقفل المهم اللى فى القلب
    ومع كده انتا قلقتنى يابنى انا بدى اغير اقوالى بسرعة
    اوباما:هوا فيه زى اوباما ادب ايه واخلاق ايه ..
    ان شاالله يارب الكلام ده يحوق!!!!!
    واحب اقولك انى بأيد المثل اللى بيقول "المبادئ ممكن اوى تتغير"

    ردحذف